Можеби сами сте го избрале сингл животот, а можеби сте научиле да го прифатите. Сингл не се само жените кои (уште) не нашле партнер, туку и разведени жени, како и вдовици, кои научиле да го прегрнат самостојниот живот, додека нивните пријатели сè уште се во брак.
Дури и ако сте целосно помирени со вашиот животен избор и искрено среќни поради пријателите кои успеваат и опстануваат во брак, сепак можете да чувствувате љубомора, фрустрација, осаменост или несигурност. Но вашиот брачен статус не мора да ја поткопа вашата самодоверба, ниту вашите пријателства.
Еве како да се справите со ситуациите и чувствата кои често ги доживуваат сингл личностите во друштво на парови.
Кога сте сингл во друштво на парови
Кога сте опкружени со парови, природно е да се појави сомнеж во себе, особено ако копнеете по она што тие го имаат. Може да се запрашате што не е во ред со вас, бидејќи не сакате или не успевате да најдете партнер.
Во тие моменти, сетете се дека вашиот мал круг пријатели не е мерило за тоа што е „нормално“. Лесно е да потонете во размислување дека животот на сите други се движи напред, а вашиот стагнира. Наместо да се споредувате, важно е да бидете љубезни кон себе. И да се потсетите дека безброј луѓе во светот се наоѓаат токму во вашата ситуација.
А и не е на одмет да го проширите кругот пријатели, особено со други сингл личности, со кои можеби ќе се чувствувате поопуштено.
Искористете ги предностите на сингл животот
Постојат многу клишеа за тоа колку е „тешко“ да се биде сам. Но во реалноста, сингл животот има и многу силни страни.
Размислете само за слободата што ја имате да истражувате хобија, интереси, нови навики. Кога вашите пријателки се жалат на партнерите или нивните роднини, вие сте слободни од таа драма.
Располагате со сопствено време и сопствени ресурси, без да се приспособувате на било чиј распоред. Многу сингл жени се гледаат себеси низ (критичката) перспектива на паровите околу нив, и затоа понекогаш забораваат дека имаат целосна слобода да се фокусираат на своите потреби и радости.
Како да уживате во друштво со парови
Најголемиот предизвик е токму заедничкото дружење. Но со правилен пристап, тоа може да биде забавно и безбрижно.
Наместо вечери за тројца (кои лесно создаваат чувство дека сте „вишок“), предложете:
- Вечер на игри кај вас
- Заеднички излез во бар
- Групни активности на отворено – планинарење, велосипедизам, кошарка
Кога плановите ги вклучуваат сите еднакво, атмосферата преминува од „сингл меѓу парови“ во „група пријатели кои се забавуваат“.
Сингл личност за време на празници и свечености
Специјални датуми како Денот на вљубените или свадби може да ја засилат несигурноста. Затоа направете план однапред.
На пример:
- Организирајте забавно дружење за Денот на вљубените со пријателки
- На свадби, прашајте дали можете да поведете +1
- По настан што ви создава стрес, испланирајте нешто убаво за себе
Овие „мали награди“ ви даваат нешто на што можете да се радувате, при тоа го намалуваат чувството на осаменост.
Како да избегнете незгодни прашања за приватниот живот
Пријателите во парови често, со најдобра намера се обидуваат да ве „спојат“ со некого. Или поставуваат прашања што не сакате да ги слушнете.
Можете љубезно да го пренасочите разговорот кон други аспекти од вашиот живот. Со тоа суптилно потсетувате дека вашата вредност не зависи од тоа дали имате партнер.
Бидете искрени за вашите чувства
Некогаш паровите, без да сакаат, ве прават да се чувствувате исклучено. Дозволено е да поставите граници со љубезност, но јасно.
На пример:
„Многу ми е драго што сте среќни, но понекогаш се чувствувам изоставено. Би ми значело да внимаваме сите да бидеме вклучени.“
Поставувањето граници не е критика туку начин сите да се чувствуваат добро и почитувано.
Извор: easylife.rs
